Fampianarana

Oniversiten’i Barikadimy Miverina eo ambany fiahian’ny OMC ny fampianarana

Fampianarana
Alarobia 09 Desambra 2020

Omaly tamin’ny 10 ka hatramin’ny 12 ora atoandro no nivory niaraka tamin’ny

governoran’ny faritra Atsinanana ireo solontenana voakasiky ny raharaha momba ny oniversite ao an-toerana. Isany ny solontenan’ny fitandroana ny filaminana avy amin’ny OMC ao an-toerana dia ny prefe sy ny FDS, ny filohan’ny oniversiten’I Barikadimy sy ny sojaben’ireo fakiolte miisa 2 voakasiky ny raharaha (FLSH sy DEGMIA), ny talen’ny kabinetran’ny minisiteran’ny fampianarana ambony sy mpanolontsaina tekinika miisa 2, ny ben’ny tananan’I Toamasina, ny solontenan’ireo mpianatra mitokony miisa 4 sy mpianatra mitaky ny fiverenan’ny fampianarana miisa 4 ary ny solontenan’ireo ray aman-dreny mikambana ao amin’ny vovonan’ny fifampiresahana sy fitoniana sosialy eo anivon’ny oniversite. Tapaka tao anatin’izany, raha ny fampitam-baovao voaray hatrany, fa miverina eo ambany fiahian’ny OMC ny fampianarana eo anivon’ity oniversite ity. Tsy nahitana fiakarana hatramin’ny taona 2014 ny saram-pisoratana anarana. Efa nanatontosa izany ny 90%n’ireo mpianatra ary te hianatra. Mbola miady ny hidinan’izay saram-pisoratana anarana izay ireo mpianatra manohy fitokonana. Izany rehetra izany, hoy hatrany ny fanazavana, no anton’ny fanapahan-kevitra. Nomarihina moa fa tsy hisy na izany aza ny fanakanana ireo mbola te hanohy ny fitokonana.

J. Mirija

Legende: Asa na ho voavaha tanteraka mialohan’ny fiafaran’ny taona ihany na tsia