Fampianarana

Oniversiten’Antananarivo Miverina miasa ny mpandraharaha PAT

Fampianarana
Alatsinainy 25 Oktobra 2021

Hiverina hiasa manomboka anio alatsinainy 25 oktobra ny mpandraharaha PAT (Personnel Administratif et Technique) eo anivon’ny Oniversiten’Antananarivo.

Nanambara izany ireo PAT ny faran’ny herinandro teo, ary naneho fahafaham-po eo anatrehan’ny fivalian’ny fitakiana. Nivoaka ny karaman’izy ireo roa volana izay notakiana, raha ny loharanom-baovao, ka izay no antony hitsaharan’ny fitokonana. Voalaza fa hisokatra manomboka anio indray ny vavahadin’ny oniversite, ary efa naneho ny hiverenan’ny fampianarana avy hatrany ny ankamaroan’ireo Sampam-pianarana sy departemanta manomboka anio alatsinainy. Raha hiverenana, dia nanomboka ny 4 oktobra hatramin’ny 11 novambra no nambara, fa fidirana ofisialy eny anivon’ny Oniversitem-panjakana. Ny 18 oktobra teo no nosokafana tamin’ny fomba ofisialy tany amin’ny Oniversiten’Andrainjato Fianarantsoa izany. Hilamina hatreo ve ny grevy sy ny fitokonana samihafa taorian’ny fandaminana sy ny fitokonana lavareny ?
Toky R