Fampianarana

Mpandraharahan’ny oniversiten’Antananarivo “Mivaly ny fitakianay rehetra vao misokatra ny oniversite”

Fampianarana
Talata 05 Oktobra 2021

Nitokona nanoloana ny fidirana na “barrière” eny amin’ny oniversiten’Antananarivo omaly ireo mpikambana eo anivon’ny sendikan’ny mpandraharahan’ity oniversite eny Ankatso ity.

Nisy ny fifampiresahan’izy ireo tamin’ny filohan’ny Oniversiten’Antananarivo iny omaly iny, raha ny fampitam-baovao, izay nitateran’ny mpitarika ny hetsika fa nanomboka ny volana janoary ka hatramin’izao dia mbola tsy nahazo famatsiana na “subvention” mihitsy ny oniversiten’Antananarivo mikasika ny karama fa ny 8 volana niainan’izy ireo teo, izany hoe, ny janoary hatramin’ny aogositra, dia ny oniversiten’Antananarivo foana no nizaka ny karaman’izy ireo. Lany tanteraka amin’izao fotoana izao ny vola eo am-pelantanan’ny oniversiten’Antananarivo ka tsy ahafahany mandoa ny karaman’ireo mpandraharaha intsony. Ny hanomezana ny karamanay volana septambra miampy vahaolana maharitra fa tsy “tip top” toy izao foana no takianay amin’ny fitondram-panjakana, hoy izy ireo. Mivaly ny fitakianay rehetra vao miverina misokatra ny oniversiten’Antananarivo, hoy hatrany ireto mpandraharaha mivondrona anaty SPATUT izay nanamarika fa miisa 1244 ireto.
J. Mirija