Fampianarana

Mpanala fanadinana BEPC 45 taona no zokiny indrindra eto an-drenivohitra

Fampianarana
Talata 17 Aprily 2018

Niakatra 12,21 % ny tahan’ireo mpiadina voasoratra anarana hiatrika ny fanadinam-panjakana BEPC amin’ity taona 2018 ity ho an’ny fari-piadidiam-pampianaran’Antananarivo renivohitra.

Tafakatra 27.980 mantsy ny isan’izy ireo ka 45 taona no zokiny indrindra hiatrika izany, hanatanterahana ny fanadinana mandritra ny efatra andro ao amin’ny lisea JJ Rabearivelo etsy Analakely. Folo taona kosa no zandriny indrindra raha ao amin’ny CEG 67 ha ny foibem-panadinana hisy azy. Hiparitaka amina foibem-panadinana miisa 32 izy ireo raha araka ny fanazavan-dRakotozafy Ramasy Harisoa, lehiben’ny fari-piadidiam-pampianaran’Antananarivo renivohitra. Miisa fito kosa ireo toerana hanaovana ny fitsarana ny fanadinana, 661 ny isan’ny efitrano fianarana handraisana azy ireo , 1.156 kosa indray ny isan’ny mpitsara raha 1.269 ny mpiambina hiandraikitra izany. Na izany aza anefa dia mbola tsy voafaritra kosa ny daty hanatanterahana ny adina ara-panatanjahantena izay fantatra fa hivoaka tsy ho ela. Efa vonona tanteraka amin’ny fiatrehana ny fanadinana BEPC moa ny fari-piadidiam-pampianaran’Antananarivo renivohitra ankehitriny, raha araka ny fantatra hatrany.

Pati