Fampianarana

Mpampivelona sy mpitsabo mpanampy Andiany faharoa 83 mianadahy no navoakan’ny UPRIM

Fampianarana
Talata 11 Desambra 2018

Namoaka ny andiany faharoa amin’ireo mpampivelona sy mpitsabo mpanampy nanovo fahalalana tao aminy nandritra ny telo taona ny sekoly ambony UPRIM etsy Andavamamba.

Miisa 83 mianadahy izy ireo izay nahavita feno ny fampianarana tany an-tsekoly sy ny fianarana asa teny anivon’ny CSB II sy ny CHU ary ny tobim-pitsaboana tsy miankina nanomboka tany amin’ny taona voalohany, raha araka ny fanazavan-dRakotovaoarison Haingo Nadia, tompon’andraikitra voalohany eo anivon’ity sekoly ambony iray ity. Afaka miatrika asa avy hatrany izy 83 mianadahy ireto ary efa misy ihany koa ireo miasa ankoatra ireo vonona ny handray anjara amin’ny fifaninanana hidirana ho mpiasam-panjakana. Nahazo fankatoavana avy amin’ny fanjakana mantsy ny diplaoma azon’izy ireo sady eken’ny minisiteran’ny asa sy ny asam-panjakana ihany koa. Ny minisitry ny mponina Rtoa Naharimamy Irmah no reny mpiahy azy ireo izay marihina fa mpianatra navoakan’ny sekoly ambony UPRIM ihany koa. Ny Ben’ny tanànan’i Talatamaty Rado Razafindratsimba kosa no ray mpiahy azy ireo. Tonga nanatrika sy nanome voninahitra ny lanonana ny filohan’ny holafitry ny mpampivelona sy ny mpitsabo mpanampy ary ireo tompon’andraikitra ambony rehetra eo anivon’ny minisiteran’ny fahasalamam-bahoaka. Navoaka tamin’ny sabotsy koa ireo mpianatra 80 mianadahy hafa notolorana ny mari-pahaizana “Diplômes de technicien superieur” nanaraka ny lalam-piofanana gestion et management, ny communication, ny droit ary ny commerce et marketing. Tao amin’ny A and C Palace Ivato no nanatanterahana ny lanonana rehetra.