Fampianarana

Partagé sur :
• facebook

Miroso amin’ny famaranana ny taom-pianarana 2018-2019 sy fanombohana ny

2019-2020 ankehitriny ny oniversiten’Antananarivo. Tokony ho tsapan’ny tsirairay fa miezaka ny mpianatra, ny mpampianatra, ny mpandraharaha eo amin’ny fiatrehana izany, hoy ny filohan’ny sendikan’ny mpampianatra mpikaroka eto Antananarivo, ny Pr Sammy Gregoire Ravelonirina. Nisy moa ny ahamehana ara-pahasalamana izay mbola tsy tena afatsika sy toy ny adino dia tokony jerena izany satria mampatahotra sy mampiahiahy raha ny mpianatra ao amin’ny taona voalohany sy faharoa dia efa mihoatra ny 800 isa nefa sady tsy voahaja ny elanelana iray metatra no tsy misy fiantohana ara-pahasalamana. Manahy izahay sao hirongatra indray ety amin’ny anjerimanontolo ny COVID 19, hoy ny filohan’ny Seces Tana. Mitaky fandraisan’andraikitry ny mpitondra fanjakana ambony izany fa tsy hoe hanao tazan-davitra izy ireo na vain-drahalahy tsy maharary. Apetraka tsara fa tokony vonona ny enti-manana rehetra avy amin’ny fitondrana toy ny vatsim-pianaran’ny mpianatra, ny fampitaovana, ny fampandehan-draharaha ary ny enti-manana amin’ny fampitam-pahalalana. Tokony vahana ny tsy fisitrahan’ny mpampianatra mpikaroka sy mpikaroka mpampianatra ny ora fanampiny izay tokony efa nositrahany ho an’ny taona 2017-2018. Malahelo izahay maheno hoe efa voasonian’ny fitondram-panjakana ambony ny an’ny oniversite miisa 5 eto Madagasikara saingy ny an’Antananarivo ihany no tsy fantatray mazava hatreto. 7 volana monja ny taom-pianarana amin’ity ka raha sanatria mbola misy fahatapahan’ny fampianarana na dia herinandro monja aza dia mampalahelo ny zana-bahoaka. Aoka tsy ho zanak’Ikalahafa ny mpampianatra mpikaroka sy mpikaroka mpampianatra eto Antananarivo, hoy hatrany ny fanazavana.

J. Mirija

Tia Tanindrazana

Samia mijoro ho an'i Gasikara.