Fampianarana

Mpampianatra mpikaroka Hiverina hampianatra fa hanara-maso ny fiasan’ny minisitra

Fampianarana
Talata 04 Febroary 2020

Noraisin’ny minisitry ny fampianarana ambony sy ny fikarohana siantifika vaovao, ny Pr Elia Béatrice Assoumacou,

voalohany taorian’ny fifamindram-pahefany tamin’ny minisitra teo aloha, ny Pr Blanche Nirina Richard, ny faran’ny herinandro teo ny avy eo anivon’ny sendikan’ny mpampianatra, raha ny fanazavan’ny filohan’ny Seces Tana, ny Pr Sammy Gregoire Ravelonirina, omaly. Nisy araka izany ny fifampidinihana mikasika ireo fomba azo atao ahafahana mamaha ny olan’ny Seces sy ny oniversite manerana ny nosy mihitsy. Efa tenin’ny minisitra rahateo fa tsy maintsy vahana ny olan’ny Seces ary andry iankinan’ny minisitera ihany koa ny mpampianatra mpikaroka sy mpikaroka mpampianatra mivondrona ao anatin’izany, raha ny fanazavana hatrany. Nisy moa omaly ny fivoriambe teny Ankatso nanapahan’ny avy eo anivon’ny Seces mikasika ny fanapahan-kevitra horaisin’izy ireo ary nanambara izy ireo fa hiverina hampianatra amin’izay sy hamita ny taom-pianarana 2018 – 2019. Hisy kosa anefa, hoy ny fanazavana, ny fanaraha-maso na “evaluation” hotontosain’ny Seces ny volana martsa sy aprily izao hijerena izay hetsika famahan’ny minisitera tomponandraikitra ny olan’izy ireo izay. Miankina amin’ny zava-misy ao anatin’izay fotoana izay no hamaritana ny mety ho tohiny.

J. Mirija