Fampianarana

Mpampianatra ao Vakinankaratra Hanao hetsika goavana amin’io herinandro io

Fampianarana
Sabotsy 30 Jona 2018

Na nisy aza ny antso avo nataon’ny Filohan’ny Repobilika sy ny Praiminisitra, hiantso ny mpampianatra hiverina hampianatra dia namaly botana ny sendikan’ny mpampianatra ao Vakinankaratra.

“Ataovy tonga any am-paosin’ny mpampianatra avokoa, tahaka ny natao tamin’ny mpitatitra aloha ny tombontsoan’izy ireo dia hiverina hampianatra ihany koa izahay”, hoy ireo mpampianatra, izay nidina an-dalambe tao Antsirabe ny andron’ny zoma 29 jona teo, niala teo amin’ny biraon’ny Dren nihazo ny biraon’ny Cisco saingy tsy nahita mpiasa tao. Nambaran’Atoa Raparison Antsamahery, mpitondra tenin’ireo sendikan’ny mpampianatra fa mbola fampanantenana poak’aty no nataon’ny Praiministra ka raha tsy mivaly sy azon’izy ireo izany tsy hampianatra izy ireo. An’ny tompon’andraiki-panjakana, manomboka amin’ny filohan’ny Repoblika sy ny Praiminisitra ny tsiny satria izy ireo no tsy mamaly ny fitakian’ny mpampianatra fa ny an’ny hafa efa voavaly avokoa. Hanao hetsika goavana, hidina an-dalambe izy ireo ny herinandro hiditra io mba ho fanta-bahoaka ny fitakiana ataon’izy ireo, raha mbola manampin-tsofina ny fitondram-panjakana.

Caius R