Fampianarana

Minisiteran’ny fanabeazam-pirenena “Tsy mangarahara ny fandraisana mpiasam-panjakana.”

Fampianarana
Talata 28 Janoary 2020

Nampitsikafona zavatra maromaro, raha ny nambaran’ny federasionin’ny sendikan’ny mpampianatra eto Madagasikara na Sempama,

faritany Antananarivo, tetsy amin’ny Koots food Mahamasina omaly ny filazan’ny filoham-pirenena fa misy minisitera tsy hay na tsy mahay mitantana na manodinkodim-bola ao. Antony nanaovan’izy ireo tombana mikasika ny tontolon’ny fanabeazana nandritra iny taona 2019 iny izany. Nampihoroin-koditra, hoy izy ireo, ny fanadinam-panjakana tao anaty taom-pianarana 2018-2019. Mahatsiaro tena ho tompon’andraikitra izahay ary menatra eo anatrehan’ireo ray aman-drenin’ny mpianatra sy ireo mpianatra. Manjakazaka ny “akamakama” mikasika ny fandraisana mpiasam-panjakana eo anivon’ny minisiteran’ny fanabeazam-pirenena, raha ny nambaran’izy ireo hatrany. Tsy mazava sy tsy mangarahara ny nanaovana ny mason-tsivana nandraisana ny mpiasam-panjakana eo anivon’io minisitera io. Misy olona 10 na 20 taona niandraiketana teo anivon’ny minisitera kanefa ireo vetivety no niditra, 2 taona, vao tonga omaly no noraisina ho mpiasam-panjakana. Nambaran’izy ireo ihany koa ny fisian’ny adilahy politika eo anivon’ny minisitera kanefa efa niadivany ela ny “dépolitisation” ao amin’ny minisiteran’ny fanabeazam-pirenena sy fampiofanana tekinika sy arak’asa. Iharan’izany anefa ny mpampianatra sy mpanabe ankehitriny satria samihafa ny politikan’ny minisitra sy ny sekretera jeneraliny. Simba ny kalitaon’ny fanabeazana fa izay mangataka alalana hampianatra na “autorisation d’enseigner” dia mahazo avokoa. Misy mahazo dia misy tsy mahazo kit scolaire kanefa hita eny an-tsena ireo ankehitriny. Taraiky ny “cantine scolaire” kanefa tsizarizary ny sakafo ao anatiny na dia andoavana 100 ariary isaky ny ankizy aza. Manahy izahay sao ity minisitera ity no tsy ahatanterahana ny veliranon’ny filoham-pirenena, hoy hatrany izy ireo.

J. Mirija