Fampianarana

Kandida BEPC 2018 Teratany vahiny ny 8, manan-kilema ny 29

Fampianarana
Alatsinainy 03 Septambra 2018

Hanomboka anio alatsinainy 3 septambra ary haharitra hefarana ny fanadinam-panjakana faharoa, BEPC (Brevet d’Etude du premier cycle) eto amin’ny tanin’ny Repoblikan’i Madagasikara.

Ny taranja Malagasy no hisantatra ny lazadina. Miisa 347.946 ny mpiadina voasoratra anarana tamin’ity taom-pianarana 2017-2018 ity ka teratany vahiny ny 8 amin’ireo ary misy kandida manan-kilema 29. 9 taona ny zandriny indrindra amin’ireo mpiadina, raha 60 taona kosa ny zokiolona. Mizara amin’ny sokajy A izay misy mpiadina 171.715 sy sokajy B misy 176.231 ireo mpiadina, izay hiatrika fanadinana amin’ireo foibem-panadinana miisa 1.032 ahitana efitrano 8.858. Efa tomombana avokoa ny fanomanana sy ny fanatontosana ity fanadinana ity, raha ny fanazavan’i Tsitohara Serge Pierrot, talen'ny serasera sy ny fampitam-baovao eo anivon'ny minisiteran'ny fanabeazam-pirenena eo. Na eo aza izany dia nohamafisina ny fitandroana ny filaminana.

Jean D.