Jean Pierre Rakotoniaina

«Tsy asa fampianarana fotsiny ny fanabeazana»

Fampianarana
Zoma 27 Martsa 2026

Tsy asa fampianarana fotsiny

ny fanabeazana fa ilaina koa ny fanovàna ny rafi-pampianarana amin’ny ankapobeny, hoy ny talen’ny lisea ao Antsirabe sady mpampianatra sy mpanabe, Jean Pierre Rakotoniaina. Ny andrasan’ny mpampianatra, hoy izy, satria hirahiraina izao ny fanavaozana dia ny fikitihana ara-drafitra mihitsy. Tsy praogramam-pampianarana fotsiny io fa ny fototry ny fitantanana mihitsy aty ambany hatrany ambony. Isany ny ady amin’ny kolikoly eny anivon’ireo rafitry ny minisitera. Ny minisiteran’ny fanabeazam-pirenena izany eto no tiana ambara. Eo koa ny fanadiovana ny fitantanana ny lafiny mahaolona. Ny resaka fampidirana mpiasam-panjakàna tsy mazava. Misy ny lalana ambanin’ny tany. Ny tokony ho ampidirina tsy tafiditra. Ny tokony tsy hiditra nefa hita anatin’ireny firaketana samihafa ireny. Olona tena hamaly ny filàn’ny fampianarana araka izany no tena andrasana. Maro ireo fitakiana nataon’ny mpanabe. Tao ny fitakiana tambin-karama sy fampidirana mpiasa ho an’ireo mbola mionona amin’ny karama omen’ny ray aman-dreny na FRAM. Ny hamaly ireny karazam-pitakiana ireny ara-drariny izany izao no andrasana, hoy hatrany ny tenany.
J. Mirija