Fidiran’ny mpianatra

Velon-taraina ireo ray aman-dreny,

Fampianarana
Talata 09 Septambra 2025

tsy mbola nisy ohatran’ity…

Somebiseby ny kilonga, hoy ny fitenenana, namonjy sekoly, ho an’ireo izay mbola manana ray aman-dreny manana enti-manana hampiana-janaka moa izany, raha ny hita omaly 8 septambra 2025. Ny zaza moa tsy mahalala hoe tsy misy, hoy ny fanehoan-kevitr’ireo ray aman-dreny, fa te hahatafita zanaka ianao dia mila ampianarina toy ny zana-bahoaka izy. Mafimafy ny fampidiràna mpianatra tamin’ity, hoy ny raim-pianakaviana iray, fanoratàna anarana fotsiny dia efa lany ny 300.000 Ariary. Mbola tsy resahina, hoy izy, ny fitaovam-pianarana sy ny saram-pianarana isam-bolana. Tsy mbola nisy ohatran’ity, hoy ny fanehoan-kevitra hafa, ny vidim-piainana koa midangana etsy an-kilany nefa ny fitadiavana tsy mandeha ohatran’ny taloha intsony fa miha tery. Hita ho velon-taraina, araka izany, ireo ray aman-dreny. Omaly moa, tamin’ny ankapobeny, no niditra nianatra ny ankamaroan’ireo mpianatra, indrindra, amin’ny sekoly tsy miankina amin’ny fanjakàna.
Nangonin’i J. Mirija