Fampianarana

Partagé sur :
• facebook

Nihaona mivantana tamin’ireo senatera eto amintsika omaly ny minisitra Paul Rabary manoloana ilay fanovana ny rafi-pampianarana sy ny tetiandrom-pampianarana izay samy hihatra manomboka ny taona 2020 avokoa raha tsy misy ny sampona.

 Nanatrika tao ny filohan’ny Antenimierandoholona Rakotomanana Honoré sy ireo mpikambana ao amin’ny birao maharitra. Anisan’ny nohazavain’ny minisitra ny mikasika ilay “Plan Sectoriel de l’éducation” izay tokony hovitaina mialoha ny taona 2018, hampiharana azy. Maro ny soso-kevitra nentin’ireo senatera fa maro koa ny fanakianana. Anisan’ireny ny hoe : fampidirana ny fanagasiana ho an’ny telo taona voalohany  amin’ny sivy taona hahazoan’ny mpianatra ny mari-pahaizana diplôme de fin d’étude fondamental izay mitovy lenta amin’ny mari-pahaizana BEPC ankehitriny. Ao anatin’ny telo taona faharoa kosa vao hampidirina ny teny frantsay arahin’ny fiofanana arak’asa mba hahazoan’ireo ankizy mpianatra miatrika asa avy hatrany ho an’ireo tsy manana fahafahana hanohy fianarana intsony. Tsy midika ho fanagasiana ny rafi-pampianarana izany, hoy ny minisitra fa famolahana ny mpianatra hahay hiteny malagasy, manoratra amin’ny teny malagasy ary manisa amin’ny teny Malagasy. Aorian’izay vao hiditra amin’ny fampianarana ny teny frantsay isika izay tsy sakana ho an’ny sekoly tsy miankina fa azony atao tsara manomboka any amin’ny préscolaire. Nafana ny adihevitra tamin’ny ankapobeny  izay nandaniana ora dimy raha kely. Mbola hoentina eny anivon’ny Antenimieram-pirenena ihany koa ny PSE, izay voarafitra anaty pejy miisa 300.

Pati

Tia Tanindrazana

Samia mijoro ho an'i Gasikara.