FANADINAM-PANJAKANA BEPC

Efa natao tany am-pianarana ny laza adina Histo-geo

Fampianarana
Alakamisy 04 Jolay 2024

Velom-panantenana ny ankamaroan’ireo mpiadina niatrika ny fanadinam-panjakana BEPC

tamin’ny taranja Histo-geo omaly Alarobia 03 Jolay. Niompana tamin’ny resaka fanjanahan-tany mantsy ny tantara raha resaka fitanterana kosa ny jeografia. Nambaran’ireo mpiadina fa efa natao tany am-pianarana avokoa ireo rehetra ireo. Betsaka mantsy ireo niasa saina mafy fa mety ho laza adina hafa mihitsy no nipoitra tany. Mba azoazon’ny aina ihany koa hoy hatrany ireo mpiadina ny taranja fizika omaly hariva. Mikasika ny taranja matematika afak’omaly Talata izay tena nampatahotra mafy ireo mpiadina dia nomarihin’ny sasany ihany koa fa mba azo nihafiana izany. Saika manantena ny ho afaka avokoa ny ankamaroan’izy ireo noho izany miampy ny taranja allemand na anglais izay hotanterahina anio Alakamisy 04 Jolay maraina. Tombanana hanomboka rahampitso Zoma avy hatrany moa ny Fitsarana ny taratasim-panadinana raha tsy misy ny sampona.
Pati
Legende : Manantena ny ho afaka ny ankamaroan’ireo mpiadina niatrika ny fanadinam-panjakana BEPC !