Fampianarana

Fampianarana « Rattrapage » iray volana aloha vao fanadinana

Fampianarana
Alakamisy 12 Jolay 2018

Nanamafy ny minisitry ny fanabeazam-pirenena Horace Gatien hatramin’ny omaly fa tsy mihemotra ny fanadinam-panjakana rehetra amin’ity taona 2018 ity.

Nametraka koa ireo mpampianatra mitokona fa tsy hiverina hampianatra raha tsy mivaly ny fitakiany ary aorian’izay dia mbola mangataka iray volana izy ireo hanaovany famerenana (rattrapage). Antony ilana io, hoy Rtoa Lovaniaina, filoha lefitry ny sendikan’ny mpampianatra mpiasam-panjakana eto Madagasikara ny fanatontosana ilay programa voafetra izay tokony hampidirina amin’ny fanadinana. Ny mpampianatra rehetra no mametra ny zavatra azo hanadinana, ny fetra famerenana tokony hatao … Raha sanatria ka tsy mihemotra mihitsy io daty io fa hoterena dia zava-doza no hiseho eto amintsika. Na ho afaka daholo ny mpianatra satria fanadinana tsy tena izy no hampanaovina azy entina hanatsarana ny fitondram-panjakana mijoro ankehitriny na faran’izay ho ratsy ny vokatra satria laza adina tsy mifanaraka amin’ny programa vita no hanerena ny mpiadina mandritra ny fotoam-panadinana. Andrasana izay mety ho vokatr’ity tsy fifanarahana misy eto amin’ny mpampianatra sy ny fitondram-panjakana ity. Nilaza ihany koa ny minisitry ny fanabeazam-pirenena omaly fa ampy izay ny fitokonan’ny mpampianatra. Handray ny andraikiny amin’izay ny tenany manomboka anio alakamisy.

Pati