Fampianarana

Fampianarana eto Madagasikara Tsy mifanaraka amin’ny tena zava-misy marina

Fampianarana
Talata 09 Oktobra 2018

Natolotra teny amin’ny minisiteran’ny fanabeazam-pirenena tamin’ny zoma 5 oktobra lasa teo ny fehin-kevitra nivoaka nandritra ny fikaonan-doha 3 andro nataon’ny mpampianatra mivondrona ao amin’ny SEMPAMA Nosy.

Vaomiera 6 no natsangana ary samy namoaka ny fehin-kevitra mahakasika ny tombontsoan’ny mpampianatra, ny fitantanana amin’ny ankapobeny ny sehatra fanabeazana ary ny fangatahana ny tsy tokony hidiran’ny fampianarana amin’ny resaka politika. Anisan’ny zava-dehibe nivoitra ihany koa ny faharesen-dahatry ny mpampianatra fa tsy mifanaraka amin’ny zava-misy eto Madagasikara ny fampianarana atao fa manaraka ambokony ny tolo-kevitra avy any ivelany, indrindra ny avy amin’ireo mpamatsy vola fotsiny izy ireo. Nisy, araka izany, ny fangatahana fihaonambe hihaonan’ny mpiasan’ny fanabeazana rehetra hijerena ny fampianarana tokony hatao eto Madagasikara. Ankoatra izay dia miandrandra ny fanafoanana ny mpampianatra FRAM ihany koa izy ireo aorian’ny fampidirana ho mpiasam-panjakana ireo FRAM efa misy eto ireo. Raha tsy maintsy handray mpampianatra FRAM dia tsy maintsy mandalo fiofanana marobe hanatsarana ny vokatra eo amin’ny sehatra fanabeazana. Nanapa-kevitra hiasa sy hiverina hampianatra moa ny mpampianatra rehetra amin’ity fidirana ho avy ity ary miandrandra izay filoha ho lany eo hiara-kanolo-tanana azy ireo amin’ireo tolo-kevitra ireo.

Tsirinasolo