Fampianarana

Bakalorea teknika Sambany no nisy fitanana an-tsoratra ny hosoka

Fampianarana
Talata 01 Aogositra 2017

Notontosaina nanomboka omaly alatsinainy ny fanadinana Bakalôrea teknika andiany faharoa, ho an’ireo mpiadina nisafidy izany. Mahatratra 9.800 izy ireo no miatrika izany.

Raha ny fanadihadiana natao tetsy amin’ny foibem-panadinana LTC Ampefiloha dia sambany tamin’ity taona 2017 ity no nisy fitanana an-tsoratra ho an’ny hosoka. Tena nanova ny fitondran-tenan’ireo kandida sy mpanara-maso tokoa izany, araka ny fanazavan’ny lehiben’ny foibem-panadinana, satria samy mahazo sazy avokoa ny roa tonta, raha sanatria ka misy izany. Nidina teny an-toerana nijery ny fizotry ny fanadinana, omaly maraina, ny Ministry ny Fampianarana ambaratonga ambony, Rasoazananera Monique. Nambarany tamin’izany fa mba ho tombontsoan’ny mpianatra no antony nandraisan’ny fitondram-panjakana izao fanovàna vaovao izao, tsy hisian’ny fianteherana amin’ny fanaovana hosoka intsony. Nandeha nankahery ireo mpitsara ny fanadinana Bakalôrea ankapobeny teny Ankatso ny tenany, taorian’izany, no sady nitsidika ny toerana fitehirizana ny naoty ihany koa. Omaly moa no nanomboka ny fitsarana, raha tsiahivina. Afaka tapa-bolana kosa no vinavinaina hivoaka ny vokatra.

Pati