Fampianarana

Bakalorea 2023 Nahemotra anio ny fitsarana ny taratasim-panadinana

Fampianarana
Talata 25 Jolay 2023

Tsy tontosa nanomboka omaly alatsinainy 24 jolay fa voatery nahemotra anio Talata 25 Jolay ny fanombohana ny

fitsarana ny taratasim-panadinana Bakalorea ho an’ny sokajy ankapobeny sy teknika. Ankoatra ilay olana vokatry ny fivoahan’ny laza adina mialoha tamin’ny tambajotran-tserasera facebook ho an’ny taranja histo-geo ho an’ny baka ankapobeny dia nifamadika ihany koa ny laza adina ho an’ireo niatrika ny baka teknika. Raha araka ny resaka nifanaovana tamin’ny mpampianatra iray dia misy specialite maromaro ao anatin’ny taranja iray ho an’ireo mpanala baka teknika. Ny nampalahelo anefa dia ilay laza adina sarotra no azon’ireo mpiadina tokony hiatrika ilay taranja tsotra raha lasan’ireo mpiadina tokony hiatrika ilay laza adina sarotra kosa ilay laza adina tsotra. Tsy afaka nanao na inona na inona anefa ireo mpiambina nanoloana izany fa dia nilaza tamin’ireo mpiadina ny amin’ny tokony hiatrehany amim-pitoniana ny fanadinana fotsiny. Nitaraina mafy ireo mpiadina noho izany ka voatery nikaon-doha fotsiny hahafahana mandrindra ny fitsarana izany sy ny fitsinjovana ireo mpiadina ireo mpitsara marobe omaly alatsinainy. Mbola miankina amin’izy ireo ihany koa moa na hotohizana hatramin’ny sabotsy ny fitsarana ireo taratasim-panadinana na hovitainy amin’ny andro’ny zoma ihany.
Pati