30%-N’NY MPIANATRA NO MAHALOA EKOLAZY

Mitaraina ny ankamaroan’ireo sekoly tsy miankina

Fampianarana
Alarobia 11 Oktobra 2023

Mila tsy hahodina ny raharaha eo anivon’ny sekoly intsony ny ankamaroan’ireo sekoly tsy miankina eto amintsika.

Vokatry ny fahasahiranan’ny Ray aman-dReny mantsy dia zara raha mahatratra ny 30%-n’ireo mpianatra sisa no mahaloa saram-pianarana ara-dalana. Ny ankoatra izay dia saika mangatak’andro avokoa raha mbola tsy ampy fitaovam-pianarana ihany koa ny zanany. Tamin’ity taom-pianarana vaovao 2023-2024 raha araka ny fanazavan’ny talen-tsekoly iray no tena mafy sy sarotra indrindra. Eo an-daniny anefa hoy izy dia mampalahelo raha horoahina ireo mpianatra satria mba te-hanovo fahalalana sy te-ho tafita ihany koa. Toraka izany ireo Ray aman-dReny izay nambarany fa tena manam-piniavana hampianatra ny zanany ny ankamaroany saingy ilay fahafahana no tsy misy. Tsy maintsy hatontona any amin’ny hanin-ko hanina isan’andro izay vola azo raha toraka izay ihany koa ny fitsaboan-tena raha sanatria tojo tsy fahasalamana. Ilay vidin’entana anefa tsy mitsaha-mitombo hany ka raha mba afaka nanangona 500 ka hatramin’ny 1000 Ar isan’andro teo aloha mba hatao saram-pianaran’ny ankizy dia tsy misy intsony izany ankehitriny. Efa misy amin’ireo Ray aman-dRenin’ny mpianatra sahady moa no tsy nahaloa saram-pianarana roa volana amin’izao hoy hatrany ity talen-tsekoly iray ity na dia vao manomboka aza ny taom-pianarana.
Pati
Legende : Tsy mahaloa saram-pianarana ny ankamaroan’ny mpianatra !