Actualités

Partagé sur :
• facebook

Nanomboka omaly dia nanao sonia fifanarahana ny tompon’andraikitra avy eo anivon’ny zandary sy polisy ato anatin’ny faritanin’Antananarivo fa afaka mifampisambotra. Teny amin’ny Mada Hotel 67ha no nanaovana ny sonia.

Nisongadina tamin’ity fifanarahana ity fa raha misy polisy voarohirohy amin’ny raharaha maloto dia afaka misambotra ny zandary. Afaka manao famotorana ihany koa izy. Tahaka izay ihany koa, raha misy polisy mahita zavatra tsy mety ataon’ny zandary na mahazo fitarainana amin’ny mety fandikan-dalàna ataon’ny zandary iray dia afaka misambotra ny polisy ary manao famotorana. Na ny andaniny na ny ankilany anefa raha misy izany dia tsy maintsy hatrehin’ny solontenan’ny tompon’andraikitra avy amin’ny polisy raha polisy ilay voarohirohy ary zandary raha zandary ilay voarohirohy ny famotorana.

Raha tsiahivina dia tsy afaka mifampisambotra ny roa tonta teo aloha fa raha misy aza izany dia tsy maintsy atolotra ny andaniny na ny ankilany ireo voarohirohy ka zandary na polisy mitovy aminy ihany no afaka manohy ilay famotorana. Voalaza ihany koa teny amin’ny 67 ha fa lany andro ny fifanarahana teo amin’ny zandary sy ny polisy teo aloha io satria efa tamin’ny taona 1969 no nanaovana azy. Ny fanontaniana mipetraka dia ny hoe hanao ahoana izany ny zandary sy ny polisy ankoatra ireo miasa ato anatin’ny faritan’Antananarivo izay hany voakasik’ity fifanarahana ity. Ny jeneraly Ravalomanana Richard sy ny jeneraly Rakotondravonona Macaire lehiben’ny polisy rahateo no tena tompon-kevitra tamin’ity fifanarahana vaovao vita sonia omaly ity.

Tia Tanindrazana

Samia mijoro ho an'i Gasikara.