Actualités

Trangam-piarahamonina Parlemantera nanodinkodina zaza tsy ampy taona

Actualités
Zoma 29 Aprily 2011

Mahoraka eran’ny tanàna ity afera ity. Efa mpamerin-keloka rahateo no nahavanon-doza, araka ny loharanom-baovao. Zazavavy vao 15 taona monja no lasibatra, izay mbola mpianatra amin’ny sekolim-panjakana. Roa andro tsy nody an-tranon-dray aman-dreniny rakalakely io tamin’ny herinandro masina ankatoky ny Paska teo. Rehefa natao ny fikarohana dia fantatry ny ray aman-dreniny fa Parlemantera amin’izao fitondrana izao, avy amin’ny faritra Sofia iny no nitana azy.

Milaza ny tsy hamela ho vita mora izao raharaha izao ny ray aman-drenin-drakalakely. Nihazo an’Antananarivo ny marainan’ny Talata rahateo ilay nanodinkodina zaza tsy ampy taona ka velon-taraina sy tezitra mafy ny rain’ilay zaza. Araka ny fantatra dia nanao tatitra sy fitarainana isan’ambaratonga ireto farany, ary milaza fa tsy hanaiky raharaham-pihavanana.

Nangonin’i Jean D.