Actualités

Takaitra navelan’i Batsirai Tafiakatra 20 ny isan’ireo namoy ny ainy

Actualités
Talata 08 Febroary 2022

Nahatratra 20 ny isan’ ireo olona namoy ny ainy teto amintsika vokatry ny fandalovan’ilay rivo-doza Batsirai, raha araka ny tatitry ny birao nasionaly misahana ny loza voajanahary na ny BNGRC.

Ny 10 tamin’ireo raha araka ny fantatra dia tany amin’ny Faritra Vatovavy Fitovinany avokoa ka nisy ireo maty nianjeran’ny hazo raha nisy ihany koa ireo namoy ny ainy nirodanan’ny trano. Tafakatra 55.000 mahery ireo traboina vokatr’izany ka ny 34.409 amin’ireo dia any amin’ny Faritra Vatovavy sy Fitovinany avokoa. Nahatratra 310 ihany koa ny trano simba, 5.767 ireo dibo-drano raha lalana miisa 19 no tapaka tanteraka tsy azo hifamezivezena . Ho an’ny lalam-pirenena fahafito manokana dia anisan’ny tapaka ny eo amin’ny PK 471+050 izay mampitohy ny distrikan’Ambalavao sy Ihosy vokatry ny fahavakisan’ny arabe. Tapaka ihany koa eny eo amin’ny PK 331+200 mampitohy an’Ambohimahasoa sy Vohiposa…. Andrasana araka izany ny asa fanamboarana hataon’ny Fitondram-panjakana hahafahana mamerina amin’ny laoniny ny fiainan’ny mponina.
Pati
Legende : Nandravarava Batsirai tany Fianarantsoa sy ny manodidina