Actualités

Savorovoro tany Vangaindrano Notafihan’andian’olona ny fonja

Actualités
Alarobia 09 Desambra 2020

Nitrangana hetsika tsy fahita tao amin'ny fonjan' i Vangaindrano ny alatsinainy

07 desambra 2020 tokony ho tamin'ny 4ora sy fahefany hariva, araka ny fanambaran’ny Minisiteran’ny Fitsarana. Nisy andian 'olona avy ivelan'ny fonja nitaky ny hamoahana voafonja iray avy nandalo famotorana tao amin'ny fampanoavana, izay nampidirina am-ponja vonjimaika. Niezaka ny hiditra an-keriny tao am-ponja ireo olona ireo ka nosintomin'izy ireo an-keriny ny vavahadibe. Namaly avy hatrany ireo mpiandry fonja ka nanao tifi-danitra (sommation) mba hihemoran'ireo andian'olona ireo. Tonga nanampy nanome tanana amin'ny fiambenana ny fonja eny ivelany avy hatrany moa ireo mpitandro filaminana tao an-toerana. Efa voaaro tsara ny fonja ankehitriny ary efa nisy ny fivoriana niarahana tamin'ny OMC (Organe Mixte de Conception) distrika hatry ny alin’io tamin’ny 9 ora alina, ary nitohy omaly talata, nahitana ny Procureur, ny lefitry ny distrika, ny Kaomadin’ny Kaompanian’ny Zandarimariam-pirenena, ary ny solombavambahoaka voafidy tao Vangaindrano.

MANDRAHONA HANDORO NY TRIBONALY SY NY DISTRIKA

Tany tan-dalàna, ka tsy misy hafa-tsy ny fanarahan-dalàna ihany no vahaolana satria efa fanapahan-kevitra noraisin’ny Fitsarana ny famonjana vonjimaika dia ny Fitsarana ihany no afaka mamoaka didy na manafoana izany, hoy ny tapak’ireo manam-pahefana. Ireo andian'olona tao ivelany Fonja kosa dia mbola niverina nanoloana ny Fonja niaraka tamin'ny fitaovana maranitra omaly maraina tamin'ny 5 maraina, na dia teo aza ny fahampafantarana azy ireo fa faritra mena « zone rouge », tsy azo aleha ny manodidina ny fonja. Rehefa izany dia niala teo ireto andian'olona ireto ka namonjy ny Tribonaly sy ny distrika ary nilaza fa handoro trano rehefa tsy mahazo valiny mahafa-po. Efa tafapetraka eny amin’ny Fitsarana Ambaratonga Voalohany Vangaindrano ny fangatahana fahafahana vonjimaika ka dia miandry izay fanapahan-kevitry ny Fitsarana ny rehetra. Efa tonga ao an-toerana ihany koa ny “renfort” na ny ekipan'ny mpiandry fonja avy any Farafangana. Hafahafa ny toe-draharaha, ary efa zava-doza izany fitakiana famoahana olona hivoaka ny fonja sy fandrahonana handoro biraom-panjankana izany.

Toky R