Actualités

Narisoa Rajaonarivony Nodimandry omaly maraina

Actualités
Alatsinainy 28 Febroary 2011

Tampoka toy ny tselatra no nandrenesan’ny mpanara-baovao omaly ny nahalasanan’i Narisoa Rajaonarivony. Ny zoma alina teo mantsy dia mbola nivahiny tao amin’ny fahitalavitra Tv Plus ny tenany nilazalaza ny fijeriny ny raharaham-pirenena amin’izao fotoana izao. Praiministra lefitra misahana ny Fitantanam-bola sy ny vola tao amin’ny governemanta Sylla taorian’ny raharaha 2002 i Narisoa Rajaonarivony. Ny fiandohan’ny volana oktobra io taona io ihany anefa dia noesorina ny tenany.

Taorian’izay dia ambasadaoro malagasy tany Washington izy. Ny toerana notanany farany dia ambasadaoron’i Madagasikara tany Frantsa. Nilaza ny tenany tao amin’ny Tv Plus ny zoma teo fa tsy toe-tsainy velively ny hanao izay hamotika sy hanahirana ny vahoaka malagasy. Araka ny loharanom-baovao dia nivoaka avy ao amin’ny trano fidiovana ny tenany omaly maraina no tratry ny tsy fahasalamana, nitsahatra tampoka ny fitempon’ny fony, ka izao niafara amin’ny fahafatesany izao.

Rakoto Maxime