Actualités

Partagé sur :
• facebook

Tonga hatrany amin’ny fampiantsoan’ny prefen’ny polisy eto Analamanga ny

fitokonana tanterahin’ireo mpiasa miisa 400 eo anivon’ny orinasa Kraomita Malagasy na ny KRAOMA. Ny faran’ny herinandro teo no nahazo ny taratasy fampiantsoana mifandraika amin’izany ny solontenan’ny mpiasa. Anisan’ny antony fampiantsoana raha araka ny fanazavan-dRajoelison Evariste, solontenan’ny mpiasa ny filazana fa tsy ara-dalàna ny fitokonana tanterahin’izy ireo. Izahay anefa hoy izy tsy eny ivelany no mitokona fa ato anatin’ny foiben-toeran’ny orinasa. Ankoatra izay hoy izy dia ny inspection de travail no nangatahana alalana ka efa nilaza izy ireo fa raha tsy misy manohitra ao anatin’ny 48 ora, fotoana hametrahana izany ilay fangatahana dia azo tanterahina soamantsara. Tsy nisy nanohitra izany hoy hatrany ity solontenan’ny mpiasa ity ka notanterahinay saingy ny mahavariana hoy izy dia andro maromaro aty aoriana vao lazaina fa tsy ara-dalana ilay fitokonana. Nomarihin’izy ireo moa fa efa 11 volana izao no nanatanterahany ity fitokonana ity ary tsy ho reraka izy ireo raha tsy azony ny karamany rehetra arahin’ny fampiodinana ny orinasa. Mikasika ireo olona 13 miara-dalana amin’ny mpitantana ankehitriny dia nomarihiny fa be noho ny vitsy izy ireo ka tsy misy mampanahy ny momba azy rehefa tsy hiara-hitaky amin’ny besinimaro. Tsiahivina moa fa nandefa taratasy fangatahana fanazavana teny anivon’ny filohan’ny filan-kevi-pitantanana PCA teny Ambohitsirohitra izy ireo ny faran’ny herinandro hatramin’ny Alatsinainy teo saingy tsy tratra hatrany ity tompon’andraikitra iray ity.

Pati

Tia Tanindrazana

Samia mijoro ho an'i Gasikara.