Actualités

Partagé sur :
• facebook

«Vehivavy tsy maha lehilahy», hoy ny hira malazan’ny faritr’i MAVAM izay.

 «Ny torimaso koa tsy maha mpitandro ny filaminana» raha ny zava-nisy tao Toamasina ny faran’ny herinandron’ny paska teo. Tena nahagaga sy tsy noheverina hisy mihitsy ary nampitolagaga ny nahalala ny vaovao nitranga tao Toamasina ity, satria kolonely iray “malaza” izay atahoran’ny olona, indrindra ny mpanao politika avy amin’ny mpanohitra sy anisan’ny nanamarika ny krizy ary mpiaro itokisan’ny FAT, no tratry ny tsy nampoiziny ny alatsinain’ny paska teo. Vokatry ny havizanana, sa noho ny fialan-tsasatra nataony, fa resin-tory tanteraka ity kolonely ity ary tena renoka torimaso lalina mihitsy. Nandritra izay anefa dia nendahan’ny olona ny volamena teny an-tendany sy ny teny an-tanana ary ny finday tany aminy, nefa tsy henony akory. Tao anaty trano fandraisam-bahiny iray tao Toamasina no nitrangan’izany.

Hatreto aloha dia tsy fantatra ny zavatra hafa mety nanjavona tamin’ity kolonely ity, sarotra rahateo ny fanangonam-baovao noho izy olo-malazan’ny fahefana avon’ny tetezamita, satria tsy miala basy ny tenany amin’ny maha manamboninahitra ambony sy amin’ny maha mpitandro ny filaminana azy. Olona nandeha niala sasatra izany anefa dia azo antoka fa tsy maintsy nitondra vola be. Ny hany fantatra hatreto, dia efa mandray an-tanana ny raharaha ny borigadin’ny zandary misahana ny heloka bevava. Ho hita eo ny tohin’ny raharaha mikasika ity kolonely “malaza” voaendaka ity.

Rakoutou

Tia Tanindrazana

Samia mijoro ho an'i Gasikara.