Actualités

Partagé sur :
• facebook

«Pety mpampijaly vahoaka, mialà ...». Io raha fehezina sy fintinina ny votoatin’ny fanambaran’ireo mpiasa an-jatony ao amin’ny fiadidiana ny tanànan’i Fianarantsoa Renivohitra, voalaza fa tsy naharay ny karamany efa ho 11 volana izao, mitaky ny fialan’ny PDS Pety Rakotoniaina.

Nanomboka ny alatsinainy dia nitokona teo anoloan’ny Lapan’ny tanàna izy ireo, rehefa avy nilahatra teny an-dalambe naneho ho hitam-bahoaka ny tsy fahafaliany. Nitohy omaly ny hetsika ary dia narantirantin’ny mpiasa nanoloana ny fidirana ny Lapan’ny tanàna ireo sorabaventy samihafa. Raha somary nangigina ny fitakiana taorian’ny fandalovan’ny filohan’ny tetezamita tao an-drenivohitr’i Betsileo farany teo iny tamin’ny fitokanana ireo fotodrafitrasa manara-penitra samihafa tao an-toerana, fa ny karama roa volana aloha no hoefain’ny fitondram-panjakana.

Hatramin’izao, hoy ireto mpiasan’ny Kaominina ireto dia tsy mbola hita izany karama roa volana izany, ka anairanay ny fitondram-panjakana foibe mba hijery haingana ny fanatanterahana izay fampanantenan’ny filohan’ny tetezamita izay. Izany no anton’izao hetsika izao, hoy ny fampitam-baovao avy amin’ny mpitarika ny sendikan’ny mpiasan’ny fiadidiana ny tanàna ao Fianarantsoa. Kaominina maromaro no ianjadiam-pahasahiranana toy izao mitranga ao Fianarantsoa izao, anisan’izany ny ao Toliara. Ny mpiasa matetika no iantefan’ny akony ratsy. Misy fiantraikany amin’ny asa sahanin’ny Kaominina ihany koa anefa izany, toy ny fandraofana fako/fanadiovana sasany, fikojakojana ny lalana.

E.R

Tia Tanindrazana

Samia mijoro ho an'i Gasikara.