Actualités

Partagé sur :
• facebook

Madio tanteraka ilay toerana fitobian’ny fako ao ambadiky ny Kaominina Ankaraobato. Omaly antoandro no niasa farany ireo fiarabe dimy nifandimby nandraoka sy nitatitra ny fako tao an-toerana nakany Andoharanofotsy, toerana anariana azy.

Roa herinandro no nanesorana ilay fako nivangongo izay nahatratra 38.500 taonina, araka ny tatitra avy amin’ny Kaominina. Volan’ny Kaominina madiodio tanteraka izay mitentina roa hetsy sy fito tapitrisa ariary no nampiasaina. “Orinasa iray any Arivonimamo no mpaka ireo fako ireo isan-taona rehefa faramparan’ny volan’ny jona iny saingy noho ny resabe fanatsatsoana anay mpitantana misolo toerana ny Ben’ny tanàna nataon’ireo andiana mponina sasany dia nitady fiaraha-miasa tamin’ny tompona fiarabe eto an-tanàna sy ny Kaominina Andoharanofotsy izay nanome toerana anatobiana ny fako izahay dia izao iaraha-mahita izao ny vokany”, hoy Randriamiarisoa Gilbert, lefitra voalohan’ny Ben’ny tanànan’Ankaraobato.

Raha tsiahivina moa dia notsikerain’ny vatan-dehilahy vitsivitsy nitonona ho solontenan’ny mponin’Ankaraobato ho tsy mahavita azy no sady malalay fonosana tsy manaiky fiaraha-miasa ireto ekipa teknikan’i Guy Maxime Ralaiseheno ireto. Nanamarika koa ny lefitra faharoan’ny Ben’ny tanàna ao an-toerana, Razafindrakotoarinala Solonirina fa hakatona tanteraka mihitsy ilay fanariampako ao ambadiky ny Kaominina fa hangonina isan-tokantrano ny fako, araka ny lamina izay hapetraka. “Fotodrafitrasa sosialy no hapetraka eo amin’io toerana io. Momba ny fako indray dia hisy ny fametrahana fandaharam-potoana isa-pokontany hanangonana azy. Hasiana ny hetra manokana antsoina hoe : ‘Redevance des Ordures Ménagères’ hanakaramana ireo mpaka fako sy ny fiarabe hitatitra azy” raha ny fanazavany ihany.

Tia Tanindrazana

Samia mijoro ho an'i Gasikara.