Actualités

Partagé sur :
• facebook

Mbola raharaha hafa nitranga teo anivon’ny seranan-tsambon’i Toamasina, teo an-tokotanin’ny Antenimieran’ny Varotra Toamasina eo anivon’ny seranan-tsambo araka ny loharanom-baovao, no nanjavona ireo kaontenera am-polony maro nisy siramamy nohafarana mpandraharaha.

Ny zandary no nandray an-tanana ny fanadihadiana satria tafiditra amin’ny faritra sahanin’izy ireo eo anivon’ny Port no nahavery ny kaontenera. Efa nisy olona nosamborina tamin’ity raharaha ity, izany R.H izany. Araka ny fantatra anefa dia toa nandoa ekôlazy enina tapitrisa ariary izany izy io dia navotsotra. Toa tsy tonga teny amin’ny fitsarana akory aza ny antontan-taratasy nanenjehana azy. Mbola anatin’ny fikaroham-baovao kosa ny Tia Tanindrazana hamantarana ny nahazo ity ekôlazy ity : ny nanao ny fanadihadiana, sa ireo mpibizina aferam-pitsarana, sa mpanao politika lava tanana ? Ny hany fantatra dia manana fiara vaventy maromaro ilay voampanga, saingy iray ihany ny laharany. Io nomerao tokana io no avadibadiny amin’ny fiara hanaovany bizina.

Ankoatra izay dia misy izany vehivavy Sinoa izany koa mpibizina miaraka aminy izay karohana fatratra amin’izao fotoana izao. Araka ny fantatra dia mbola ifanenjehan’ny fanjakana koa io Sinoa vavy io, noho izy voarohirohy ho saika hanondrana “bois de rose”, nogiazana teo anivon’ny seranan-tsambo, farany teo. Andrasana izay ho tohin’ny fanadihadiana sy ny marina amin’izy ity, fa hatreto aloha dia ireo mpandraharaha ara-dalàna hatrany no lasibatra sy idiram-patiantoka manoloana ity halatra efa miseho masoandro eo anivon’ny seranan-tsambon’i Toamasina ity.

Tia Tanindrazana

Samia mijoro ho an'i Gasikara.