Foulpointe

Anisan’ny habibiana vitan’izy ireo ny nanolanan’ny jiolahy efa-dahy ankizivavy 11 taona teo imason’ny ray sy reny niteraka azy ny alin’ny 19 aogositra. Simba tanteraka ilay ankizivavy no tsy mety salama noho ny nanjo azy sy ny aretim-po nateraky ny fanolanana azy. Nanomboka teo ny fikarohana ireo jiolahy. Ny 27 aogositra no voasambotra tao Mangarano II Toamasina i Ravo Victorien, 32 taona. Izy no nanoro ny namany ka voasambotra tao Mangarano II Toamasina ny 28 aogositra koa i Lekamisy Justin, 49 taona, izay miaramila ao Toamasina. Mbola tao Mangarano II hatrany no tratra koa ingahy Razafimahatratra Marcelin Justin, 32 taona, ny 30 aogositra. Ny sabotsy 31 aogositra tamin’ny 6 ora hariva, teo an-dalana handeha hivarotra omby halatra tao Mahavelona Foulpointe no nanaovana vela-pandrika i Gae, fantatra amin’ny tena anarany Martin Gaston, raha nahazo vaovao tamin’ny fampiasany ireo finday halatra ny zandary tao Mahavelona Foulpointe. Nisy ny fifanenjehana.

Tsy nisy basy rahateo teny aminy ka mora ny fisamborana azy. Na izany aza dia nahitana bala 5 tao am-paosiny. Nandritra ny fisavana ny tranony tao Andranomadio Foulpointe no nahitana basimborona Calibre 12 miaraka amin’ny bala 4, sy Pistolet Revolver miaraka amin’ny bala 9 mm niisa 6, ary nahitana karazam-panafody gasy anaty fonosana maromaro ankoatra ny karazana finday. Nandritra ny famotorana rehetra natao azy ireo, dia niaiky ny heloka vitany izy efa-dahy, anisan’izany ny fanolanana ilay ankizivavy 11 taona. Manahy amin’ny fisiana fitaovam-padiana sy ekipa hafa afenin’i Gae ny zandary ka manitatra ny fanadihadiany. Anio talata 3 septambra kosa no hiakatra Fampanoavana ao Toamasina izy efa-dahy. Andian-jiolahy nifampitadiavan’ny mpitandro ny filaminana tao Toamasina hatry ny ela ity ekipan’i Gae ity. Mangataka ny handefasana azy ireo any Tsiafahy avokoa ny ankamaroan’ny olona sy mpandraharaha efa lasibatr’izy ireo tao Toamasina renivohitra.