Actualités

Foire Vidy Varotra Vonona ny andiany faha-11

Actualités
Alarobia 27 Aprily 2011

Raikitra afaka 48 ora ny Foire Vidy Varotra. Eo amin’ny andiany faha-11 izy amin’ity indray mitoraka ity, hatao ao amin’ny Lapan’ny kolontsaina sy ny fanatanjahantena Mahamasina. Haharitra hateloana, ny 30 aprily ka hatramin’ny 01 mey ny hetsika, mifanotona indrindra tamin’ny fotoana fandraisan-karama faran’ny volana sy fifaranan’ny fotoam-pialantsasatry ny mpianatra mialoha ny hiatrehana indray ny telo volana farany. Fotoana azon’ny mpianakavy hararaotina hiantsenana, hamenoana ny filana ao an-trano toy ny sakafo, na koa ny kojakoja ilain’ny mpianatra mialoha ny hiverenany indray an-tsekoly. Koa satria mamaramparana ny fialantsasatra ny mpianatra amin’io ka dia fotoana fanararaotra hialana voly io Foire Vidy Varotra io, eny fa na dia ny fahitana ireo karazana alika, fiara, sy kilalao fanitaran-tsaina samihafa fotsiny aza, satria dia ho hita ao avokoa izany toy ireo fitaovana momba informatika sy ny hiaka farany amin’ny finday. Efa tomombana avokoa ny zava-drehetra, araka ny nambaran’ny mpikarakara ary dia miandry ny mpitsidika izy ireo manomboka ny zoma 30 aprily izao.

Jean D.