Faritra Analamanga

Partagé sur :
• facebook

Hiaraka hiasa akaiky manomboka izao ny Faritra Analamanga sy ny region Champagne Ardenne atsy Frantsa.

Tontosa soa aman-tsara ny herinandro lasa teo tany Frantsa ny sonia fifanekem-piaraha-miasa teo amin’ny lehiben’ny faritra  roa tonta, izay hanome vahana bebe kokoa ireo sehatra tsy miankina eto amintsika, araka ny fanazavan’ny lehiben’ny Faritra Analamanga, Mananjara Randriambololona. Hiompana amina sehatra maro loha ny
fiaraha-miasan’ny roa tonta, araka ny fantatra ihany. Na izany aza dia sehatra vitsivitsy aloha no ao anatin’ny laharam-pahamehan’izy ireo amin’izao fiandohany izao, fiaraha-miasa
haharitra telo taona ary mbola azo havaozina tsara. Anisan’izany ny fampiroboroboana ny tontolo ambanivohitra, ny sehatry ny fizahantany, ny taozavatra sy ny asa tanana ary ny fametrahana ireo karazana fotodrafitrasa maro samihafa ara-tsosialy sy ara-toekarena arahin’ny fifanakalozana traikefa. Ny roa tonta no hijery miaraka sy hanapaka izay tetikasa hotanterahina amin’ny alalan’ilay  Comité Mixte izay efa tafajoro tarihin’ny lehiben’ny faritra roa tonta miaraka amin’ireo teknisianina enina avy  avy amin’ny an-daniny sy ny an-kilany. Hahazo tombony be dia be avy amin’io fiaraha-miasa io isika eto amin’ny faritra Analamanga. Ny volana Desambra ho avy izao no handalo voalohany eto amintsika ireto teknisianina avy any amin’io faritra Champagne-Ardenne atsy Frantsa ho fanombohana ny asa.

Pati

Tia Tanindrazana

Samia mijoro ho an'i Gasikara.