Actualités

Partagé sur :
• facebook

Tsy mbola ato ho ato mihitsy ny hanitsiana ny marikaraman’ny mpiasam-panjakana, araka ny fanazavan-dRanjivason Jean Théodore, filohan’ny vaomieran’ny lalàna sy ny asam-panjakana ao amin’ny Filankevitra ambonin’ny tetezamita.

 Raha vao tonga ny fitondrana tetezamita dia maro be ireo karazana fitakiana sy fanovana nipoitra tetsy sy teroa ka anisan’izany ity fanitsiana sy fanamboarana ny marikarama notakian’ny sendikan’ny mpiasam-panjakana ity, satria raha araka ny fanazavan’izy ireo dia mikorontana tanteraka izy io ary misy ny tsy rariny. Misy, ohatra, ny olona mitovy mari-pahaizana sy fiofanana natao izao, samy mpiasam-panjakana kanefa dia samihafa ny marikaramany, eo ihany koa ilay hoe ny zandriny amin’ny taona niasana indray no be grady noho ny efa naharitra ela na dia mitovy tsara izao aza ny mari-pahaizana.

Efa nisahana ny ministeran’ny asam-panjakana sy ny asa ary ny lalàna sosialy nandritra ny fitondrana Ravalomanana Ranjivason ary nilaza izy fa efa tamin’izay no nanombohana ny fanitsiana sy fandaminana ity tontolon’ny asam-panjakana ity saingy mbola lavitr’ezaka ny asa, nisy rahateo koa moa ny fahatapahan’izany asa izany noho ny fiovan’ny tompon’andraikitra sy ny krizy. Nanamafy ity mpikambana ao amin’ny Filankevitra ambonin’ny tetezamita ity fa mitombina tsara mihitsy ny fitakiana saingy tsy mbola azo tanterahana aloha raha ao anatin’izao fitondrana tetezamita izao satria vola be amina miliara no ilaina, kanefa ny fanjakana mbola ao anatin’ny fitsitsiana. Efa eo am-pelatanan’ny fanjakana ny fitakian’ny mpiasam-panjakana saingy raha tsorina izany ny resaka dia tsy maintsy miandry ny fijoroan’ny fitondrana vaovao ao anatin’ny Repoblika faha-IV vao hodinihana ny fanatanterahana izany.

RTT

Tia Tanindrazana

Samia mijoro ho an'i Gasikara.