Actualités

Fandaharanasa sy drafitra fampandrosoana Ho diso anjara i Madagasikara

Actualités
Alarobia 09 Aprily 2014

Tsy taitra, tsy maika kanefa tena tara ny mpitondra Malagasy vaovao miandrandra ireo fanampiana avy any ivelany raha izao fandehan�ny toe-draharaham-pirenena izao.

Roa volana mahery mantsy izay no lasa nefa tsy mbola mijoro ihany ny governemanta ara-dalàna. Ireo fandaharanasa sy drafitra fampandrosoana anefa tsy afaka hiandry ny fitavozavozantsika, eny fa na dia efa mba mizotra amin’ny fiverenana amin’ny ara-dalàna aza ny fitantanana ny firenena. Efa mihatra eto, ohatra, ilay paikadim-pirenena fanaingana amin’ny fampandrosoana izay raisin’ny fandaharanasan’ny Firenena Mikambana misahana ny fampandrosoana an-tanana.

Mbola fanontaniana mipetraka kosa hatreto ireo famatsiam-bola mikasika ny Tanjon’ny taona arivo fahatelo andiany faharoa mila tratrarina amin’ny taona 2030, ny Tahiry Eoropeanina momba ny fampandrosoana na FED andiany faha-11 izay famatsia-bolan’ny taona 2014-2020 mitentina 600 tapitrisa euros. Eo ihany koa ny fandaharanasa famatsiana herinaratra vaovaon’ny filoha amerikanina Barrack Obama «Power Africa» tena ilain’ny firenena Malagasy izay ahitana bolongambola 9 arivo tapitrisa dolara. Ho diso anjara ihany i Madagasikara satria tena tsy ao mihitsy ny fahavononana sy ny finiavana ara-politikan’ny mpitondra sahy manapa-kevitra.