Actualités

Atsimondrova-Ambatondrazaka Nisy nametraka baomba

Actualités
Talata 01 Aprily 2014

Olona sendra nandalo no nahatsikaritra voalohany fa misy zavatra mifono hafahafa ao anaty trano zozoro manamorona ny arabe misy ny fanariam-pako ao amin�ny Fokontany Atsimondrova Ambatondrazaka, omaly.

Hatairana ny an’ny rehetra raha nahita ilay zavatra tao anaty fonosana toy ny tavoahangy misy tsentsina sy lahiny ary nampiarahana tamin’ny bala vitsivitsy. Niantso ny tompon’andraikitra tao amin’ny Fokontany io olona io, ka ry zareo avy eo no nandray andraikitra nanala ilay baomba ka nitondra izany tany amin’ny mpitandro ny filaminana. Rehefa tonga tao amin’ny mpitandro ny filaminana ilay izy dia nanamarina ny tao fa tena karazana asa fampihorohoroana tiana handemena ny saim-bahoaka io.

Karazana “cocktail Molotov” io, hoy ny polisy saingy ny nampiavaka kely azy dia ny fisian’ilay bala, izay rehefa mipoaka dia toy ireny tsipoapoaka lehibe ireny. Efa an-dalam-pikarohana izay mety nanao izao asa fampihorohoana ny mponina any Ambatondrazaka izao ankehitriny ny mpitandro ny filaminana any an-toerana.