Actualités

Asam-panjakana Mpiasa matoatoa 330 indray no tratra

Actualités
Talata 05 Aprily 2022

Raha ny tatitry ny gazety boky mivoaka isan-kerinandro eo anivon’ny ministeran’ny toekarena sy ny fitantanam-bola dia nisy mpiasam-panjakana matoatoa 330 indray no tra-tehaka.

Tapaka avy hatrany karaman’izy ireo ary nahavitana tahiry mitentina 3,8 miliara ariary ho an’ny kitapom-bolam-panjakana izany. Voalaza fa miasa ary mahomby tsara ilay rindram-baiko AUGURE 2 izay ampiasaina amin’izao fotoana handaminana sy handrindrana ny tontolon’ny asam-panjakana; manamora ny fanomanana ny tahirim-bola fisotrooan-dronono izy io no sady ahafahana mamadika ireo ECD (mpiasa anaty fotoana voafetra) ho lasa ELD (mpiasa maharitra).Hatreto dia mpiasa ELD vaovao miisa 7198 no voarakitra ao anatin’ny AUGURE 2, ary efa voaloa ara-dalàna ny karaman’izy ireo. Tafiditra ao anatin’ny ezaka fanadiovana ny asam-panjakana izany rehetra izany mba tsy haha very fahatany ny volam-panjakana noho ny fisiana mpiasam-panjakana matoatoa, tsy miasa akory kanefa mandray karama tsy tapaka isam-bolana.
RTT