Actualités

Antsirabe Misy hetsika hafa mipoitra

Actualités
Zoma 25 Mey 2012

Mihazakazaka ny fandehan�ny raharaham-pirenena ka mivoatra manaraka izany koa ny any amin�ny faritra.

Fantatra ary izao fa dia misy indray ny andian’olona leon’ny fahasahiranana sy jadona miha mahazo laka eto amin’ny firenena izao ka tapa-kevitra fa hanomana hetsika goavana ato ho ato. Nambaran’ireo mpitarika fa hanetsika ny mponin’Antsirabe manontolo no tanjon’izy ireo ka tsy ho ela intsony izany. Tsikaritra moa fa saika olom-baovao sy tsy mbola tazana teny an-kianja ireto vonona ny hihetsika ireto ka voalaza fa mba hialana amin’ny mety hisian’ny kajikajy politika no antony araka ny fanazavana. Nambaran’izy ireo fa hanara-dalana ny hetsika hatao saingy efa mivonona amin’ny ramatahora mety hiseho. Etsy an-daniny dia efa mampiomana ny mponin’Antsirabe izy ireo fa sioka tokana fotsiny hoy izy ireo dia “lasa izao” ka na ireo mpitolona ao amin’ny Magro Avaratsena aza dia taomin’izy ireo hiaradia aminy amin’izany satria tanjona tokana ihany no tiana hitodiana dia ny fampiharana ny tena Demokrasia izay nolazaina fa tsisy teo aloha kanefa izao vao maika aza tena nofoanana. Andrasana araka izany ny ho fivoaran’ity hetsika ity.

Caïus Raharison