Actualités

Partagé sur :
• facebook

Tsy hanaiky hatramin’ny farany ny ankolafy Zafy manoloana ny raharaha andramena. “Raha tsy mivoaka ny marina rehetra momba ny fanaovana ampihimamba ataon’ny mpitondra ny harem-pirenena, indrindra momba ity afera malaza ity dia tsy hisy izany filaminana izany”, hoy i Lalatiana Ravololomanana.

 Mikasa hanatona ny mpampanoa lalàna fanindroany indray ry zareo taorian’ny filazan’ny talen’ny kabinetran’ny Minisitry ny fitsarana fa tsy mbola tonga eny anivon’ny ministera ny dosie izay nolazaina azy ireo ho efa nampirimina. Tsy mbola nambaran’izy ireo mazava anefa ny datinandro handehanana indray eny Anosy io. Raha sanatria tokoa ka efa nokilasiana na nampirimina io fitoriana io dia hirotsaka ho “partie civile” indray izahay, hoy i Tombondraza Dominique avy amin’ny Tanora Ankolafy Zafy. Ankoatra izay dia hisy ny fanetsehana ny fitoriana napetraka eny amin’ny Bianco momba ity raharaha ity ihany izay tsy ahenoana tohiny hatramin’izao. Hatao laharampahamehana koa ny fanaterana dosie eny anivon’ny Masoivoho sinoa satria ny ambasadaoro vaovao dia milaza fa tsy manana ny anaran’ireo mpiray tanindrazana aminy voasaringotra amin’ny resaka andramena ahafahany manao fanadihadiana.

Mbola notsiahivin’ireto avy amin’ny ankolafy Zafy ireto indray fa “tsy i Andry Rajoelina irery no torian’ny profesora Zafy ho tomponandraikitra amin’ny fanondranana an-tsokotsoko ny andramena fa anisan’izany koa i Mamy Ravatomanga”. “Mitory an’ny Dr Joseph sy ny Free FM ho manosoketa azy ity farany izao koa nahoana raha mitory ny filoha Zafy koa ?”, hoy Ralalasoa Sophia avy amin’ny Reny Mijoro, fikambanana mivondrona ao anatin’ny Ankolafy Zafy ihany.

Yves

Tia Tanindrazana

Samia mijoro ho an'i Gasikara.