Politique

Partagé sur :
• facebook

Aseho amin’izao tontolo izao fa tsy miala eto isika raha tsy miverina ny ara-dalàna fa ny vahoaka miandrandra ny handresy ny eto, hoy ny Depiote Zafilahy Stanislas teny amin’ny kianjan’ny Magro Behoririka ny talata 10 aogositra.

Maro ireo sms sy antso an-tariby tonga tany aminy miahiahy sao dia voasariky ny namany koa izy ka andeha hifampidinika amin’ny mpitondra FAT. Tsy hanao vavolombelona mandainga hanamelohana ny namana aho, hoy izy. Nampahatsiahiviny fa efa nisy ny resaka 3 miliara nanambatambazana azy taloha saingy nolaviny izany. Mety hivaly any amin’ny taranaka faramandimby na dia tsy mivaly izao dia izao aza ny famadihan-tanindrazana. Izay manao ratsy mbola hotsarain’ny tantara ary na tsy voatsara ety aza mbola hotsaraina any ambony. Tsy olana n’iza n’iza mpamadika fa ny marina sarotra tadiavina tsy mba maty. Hery lehibe ho antsika ny zava-misy, tsy mampihemotra fa vao mainka mampandroso. Ilaina ny krizy nahafantarana ny marina. Fa izao ilay nolotoina omaly dia mamiratra toy ny volamena latsaka am-bovoka. “Aza matahotra minoa fotsiny ihany fa tsy maintsy miverina eto hiaraka hanarina ity firenena ity amintsika ny Filoha Marc Ravalomanana”, hoy izy. Mikasika ny resaka aelin’ny radio sy tele sasany hoe : efa miantso hifampidinika Rajoelina ka ahoana no mbola mihazohazo ihany ny Ankolafy telo ? Tsotra ny valin-teny homena azy ireo, hoy ny depiote Zafilahy Stanislas : “Aza manodikondina resaka fa efa nazava ny fifanarahana tany Maputo sy Addis Abeba fa tsy izy ny fanapahan-kevitra mandeha tokana fa tsy maintsy iarahan’ny rehetra no atao”. Mikasika ny dinika teny Ivato dia mazava ny hevitr’ity filohan’ny vondrona parlemantera Tiako I Madagasikara tao amin’ny Antenimieram-pirenena ity, fa “tsy hamokatra io”.

Tia Tanindrazana

Samia mijoro ho an'i Gasikara.