Politique

Zafilahy Stanislas Izay no vita ny amin�ny FAT

Politique
Zoma 08 Oktobra 2010

Tsy nampoizin’ny Frantsay ny fitiavan’ny vahoaka an-dRavalomanana, hoy i Zafilahy Stanislas, solombavambahoaka voafidy tao Vavatenina, faritra Analanjirofo. Hatrany amin’ny toerana faran’izay lavitra aza dia nahazo anjara tamin’ny filoha Ravalomanana daholo tamin’ny fitondrany. Vao nipoitra ny FAT dia nijoro nanohitra azy ireo ny vahoaka teny Ambohijatovo, ny 21 martsa 2009. Vahoaka marobe noho ireo vondron’olona tonga teny amin’ny Kianjan’ny 13 mey. Mandraka ankehitriny, hoy izy, dia mijoro ny Malagasy. Raha ny fahitan’ity olom-boafidy ny zava-misy ankehitriny dia hihetsika avokoa ny vahoaka manerana ireo sampandraharaha rehetra afaka andro vitsivitsy. Noho izany, dia mila miomana isika, hoy izy tamin’ireo mpanara-dia amin’ny Ankolafy Telo. Ankilan’izany, hoy ihany i Zafilahy Stanislas dia tsy manaiky ny hofitahan’ny Frantsay ny filoha Ravalomanana. Araka ny fanazavana dia mangataka fihaonana aminy hatramin’izao ny solontena frantsay saingy tsy mahazo rirany. Momba ny ho fiarahan’ireo filoha roalahy mody moa dia nohamafisin’i Zafilahy Stanislas fa dia manantena ary vonona hitsena azy ireo ny vahoaka Malagasy. Nofinofy izany fifidianana na fitsapan-kevi-bahoaka izany, hoy izy, ary dia izay no vita ny amin’ny FAT.

Nangonin’i Soa