Politique

Partagé sur :
• facebook

“Hametraka fitoriana amin’ny daty rehetra nisy naratra sy namoy ny aina isika. Tsy tamim-pieritreretana no nanaovana ny 17 martsa satria niteraka fahaverezan’asa, fiainana miha sarotra. Tsy misy azo antenaina fa lainga sy fitaka mifono fampanantenana poakaty no betsaka ankehitriny”, hoy ny solombavambahoaka Zafilahy Stanislas.

Tsy mitombina ny filazana fa noho ny hetsi-bahoaka no nanalana an-dRavalomanana, hoy ihany ity depiote ity. Adinon’ny FAT, hoy izy ny nampitaha ny lazaina fa vahoaka tonga teny amin’ny Kianjan’ny 13 mey sy ny teny Mahamasina ny volana febroary 2009. “Raha mbola sahy ianareo dia omeo toerana malalaka izahay dia andao indray hanao fampitaha”, hoy ihany Zafilahy Stanilas. Momba ny tetezamita tadiavina hapetraka dia heverin’ity olom-boafidy fa loza raha mipetraka izany kanefa tsy niarahan’ny rehetra. Tsy tena fihaonambem-pirenena hiarahana manko no hatao. Vokany dia hitondra krizy vaovao, ratsy sy ho mafimafy kokoa, araka ny fanazavana. Nanasa ny fiarahamonim-pirenena sy ny Raiamandreny Mijoro moa ny tenany mba ho tonga eny amin’ny Kianjan’ny Finoana, hanazava amin’ny vahoaka ny tanjona tian’izy ireo hahatongavana. Nohamafisin’i Zafilahy Stanislas moa fa Ravalomanana no nandrotsahan’ny vahoaka ny vatony fa tsy Andry Rajoelina, ka izay no takian’ireo mpitolona eo amin’ny Magro, dia ny hamerenana izay safidiny izay. Tsy ho ela, hoy ihany Zafilahy, dia hitsena an-dRavalomanana sy Ratsiraka ny profesora Zafy Albert sy ireo vahoaka an-tapitrisany.

Tia Tanindrazana

Samia mijoro ho an'i Gasikara.