Politique

Yvette Sylla Lasa mpanao politika tanteraka

Politique
Alarobia 05 Mey 2010

Nirotsaka an-tsehatra eo amin’ny sehatra politika i Yvette Sylla, vady navelan’ny filohan’ny Antenimieram-pirenena teo aloha, Jaques Sylla. Nanangana fikambanana ara-politika mitondra ny anarana «Madagasikara Mandroso» izy ary nampahafantarina omaly ny fisiany. Nijoro ara-panjakana ny 18 martsa 2010 lasa teo ny fikambanana tarihiny izay manaraka ny fotokevitra repoblikana sy ny fahalalahana demokratika. Na dia tsy mbola antoko politika aza anefa ny «Madagasikara Mandroso» dia handray anjara amin’ireo fifidianana hotontosaina eto amin’ny firenena. Mbola baraingo kosa ny fanolorany kandida mandritra ny fifidianana filoham-pirenena. «Tsy misy afa tsy ny fifidianana rahateo no vahaolana amin’izao krizy izao ka atomboka amin'ny fifidianana solombavambahoaka izany», hoy i Yvette Sylla. Raha ny fanazavany ihany dia miankina amin’ny fahazotoan’ny mpifidy mandatsa-bato no hitsarana raha ankatoavin’ny vahoaka ny fitondrana ankehitriny na tsia. Nambarany koa fa io fifidianana io no hamantaran’ny firaisambe iraisampirenena raha ankolafy tokana ihany no mikarakara izany. Milaza ho efa manana solontena any amin’ny faritra ny «Madagasikara Mandroso” na dia tsy mahenika ny faritra 22 aza.

Andry