Politique

Partagé sur :
• facebook

Niverina tamin’ny teniny ary nitondra fanitsiana hialana amin’izay mety ho fandikana vila sy izay mety ho safotofoto-kevitra nateraky ny fanambarana an-gazety nataony ny 06 jolay 2010 teo i Raharinaivo Andrianatoandro.

Tamin’ny fanambarana nataony, omaly, no nilazany fa tsy azo ekena ny hampitarazoka izao toe-draharaha izao raha tsy hampandry fahalemana ny tany ama-monina. Tsy ho izahay mihitsy hoy Raharinaivo no ho sakana ka hampandamoka ny ezaka natao hatramin’izay hampisy fitoniana hamerenana ny fiaraha-monina politika mirindra eto.

Koa noho izany indrindra no ilazanay, hoy ny fanambarana, fa ny ezaka fanelanelanana ataon’ny fiaraha-monim-pirenena amin’izao endriny izao, dia tsy tokony hiteraka ahiahy amin’ny hoe miandany na koa ho loharanon’ny disadisa indray fa hoe tsy tenierana na mifanohitra amin’ny ezaka ataon’ny sehatra iraisam-pirenena na ho sakana amin’ny finiavana hamahana ny krizy efa nimasoan’ny SADC. Koa fahitany ny atao hoe fivondronan’ny fiaraha-monim-pirenena, araka ny kabarin’ny filoha Marc Ravalomanana nandritra ny fankalazana fetim-pirenena, dia tena ny fianakaviamben’ny fiaraha-monim-pirenena mitambatra, tsy misy ankanavaka, fa tsy ny «COSC» na ny «AOSC» amin’ny endriny amin’izao fotoana izao ihany. Ary ny ezaka ataon’izy ireo dia tokony hifameno amin’izay ataon’ny sehatra iraisam-pirenena fa tsy ny mifanohitra amin’izay. Nanamafy moa i Raharinaivo fa ny fandraisan’ny hery velona rehetra anjara tsy misy ankanavaka, indrindra ireo antoko lehibe, amin’ny dinika famahana ny krizy ihany no azo antoka fa hahazo fantokavana. Notsiahivin-dRaharinaivo Andrianantoandro raha namarana ny teniny izy fa ny krizy politika dia mila vahaoloana politika.
Nangonin’i Jean D.
 

Tia Tanindrazana

Samia mijoro ho an'i Gasikara.