Politique

Tonton Ambroise Mijoro hanavotra ny firenena

Politique
Alarobia 05 Mey 2010

Mikatso ny raharaham-pirenena. Tapi-dalan-kaleha ny ankolafy efatra raha tarafina amin’ny vokatry ny dinika tany Pretoria sy ny filazan’i Andry Rajoelina teo am-pahatongavana raha niverina avy any Afrika Atsimo izy fa vita hatreo ny fifampidinihana amin’ny ankolafy telo. Misy ny vahaolana, hoy i Tonton Ambroise. Tsy azo avela hoviravirain’ny sasany amin’izao ity firenena ity, fa mila olona tompon’andraikitra mijoro hanavotra ny firenena. Tonga ny fotoana hamindrana ny fahefana amin’ny miaramila ka hiroso amin’ny «alternance positive militaro-civile», hoy ny tenany. Izay madio tanana ihany no mandray anjara amin’io rafitra io, izay ho vonjimaika ihany, mandra-panangana ny governemantan’ny firaisam-pirenena. Tsy miditra amin’izany ireo miaramila sy sivily nanodidina an’i Andry Rajoelina tamin’ny fanonganam-panjakana teto. Fampandehanan-draharaha ihany no hosahanin’io rafitra io, saingy efa hampihatra sahady ireo fifanarahana politika vita sonia tany Maputo. Izay no andrandrain’ny vahoaka hivoahana amin’izao krizy izao, hoy i Tonton, izay tsy nihambahamba niteny fa ho avy hanohana ary vonona hitarika ny vahoaka izy amin’ny fanatanterahana izany.

Nangonin’i Jean D.