Politique

Partagé sur :
• facebook

Mafanafana tao Toliara omaly. Andian’olona maro no nirohotra teo anoloan’ny Lapan’ny Fitsarana, niara-dia tamin’ny Herim-bahoaka Mitambatra mitaky ny hamoahana ny havany sy ireo olobe ao an-tanàna, miisa fito, nosamborin’ny FAT ary notanana am-ponja vonjimaika any an-toerana taorian’ny famoriam-bahoaka nitranga tao Toliara ny 27 aogositra lasa iny.

Ny Pr Mandridake Elimberaza no namory vahoaka tamin’io andro io. Naparitaky ny Emmo-Reg tamin’ny baomba mandatsa-dranomaso izy ireo. Nisy andian’olona nanararaotra ny savorovoro ka nirodorodo tao amin’ny radio Soatalily ary namotika ny ampahan’ny fitaovan’ity radiom-panjakana ity. Taorian’izay dia raikitra ny hazalambo ireo lohandohany nitarika io famoriam-bahoaka io. Valo no voasambotra ka ny fito amin’izy ireo nampidirina am-ponja avokoa, dia Rabeony Mandridake, Sazalahy Tsianihy, Tambabelo Mandaso dit Marin, Torimana Evaharane, Rafilo Jean Filista, Lantera Patita ary Bonnaure Sazalahy. Nakorohina mafy saingy tafaporitsaka any an-dafy ny Pr Mandridake Elimberaza, araka ny fanambaran’ireo manodidina azy. Ankehitriny, miakatra ny feo, ary mahery vaika ny hetsiky ny Herim-bahoaka Mitambatra mitaky tsy misy fepetra ny hamoahana sy famotsorana madiodio azy fito mianaka. Mifanotona amin’ny fitokonan’ny mpiasan’ny fitsarana tarihin’ireo mpitsara ny hetsika. Tsy nisy birao nisokatra raha ny omaly. Efa teny ho eny ny Emmo-Reg, fa tsy nampihemotra ny olona, izay hita ho mafana ra raha ny fisehony omaly. Somebiseby be ihany ny olona ao Toliara amin’izao fotoana samy miandry izay ho tohin’ity raharaha ity. Hitohy anio rahateo ny hetsika.

Tia Tanindrazana

Samia mijoro ho an'i Gasikara.