Politique

Partagé sur :
• facebook

Tapa-kevitra indray hiverina eo amin’ny sehatra politika i Thierry Raveloson Mahasampo Francis rehefa tsy tazana nandritra ny fito taona. “Nipirina mihitsy aloha”, hoy izy raha nanontaniana.

Misy ny fotoana ahanginana ary misy ny fotoana hitenenana, ka tonga izao ny fotoana hitenenana sy handraisana andraikitra miara-mitady vahaolana hamoahana an’i Madagasikara amin’izao krizy diaviny izao. Maro rahateo ireo olobe tany Toliara tany miandrandra azy nanosika azy hirotsaka indray amin’ny sehatra politika. Vontovorona no nosafidiany hisehoana indray. Anisan’ireo mpitarika antoko tonga nikaondoha teny, nanoina ny fampihaonana ireo mpanao politika nokarakarain’ny Fandrindrana nasionalin’ny firaisamonina sivily na CNOSC i Thierry Raveloson. Ity farany dia anisan’ireo enin-dahy notendren’ny fitondrana Ravalomanana ho filohan’ny delegasiona manokana (PDS) hitantana faritany mizakatena, ny martsa 2002, dia i Sikonina Victor (Toamasina), Pierre Tsiranana (Mahajanga), Thierry Raveloson (Toliara), jeneraly Razakarimanana Ferdinand (Antananarivo), Pety Rakotoniaina (Fianarantsoa) ary i Jaosoa Pascal (Antsiranana). Rehefa nosoloina an’i Mory Maur Martin izy dia nanangana ny antokony, MDSM (Mouvement pour la Démocratie Sociale à Madagascar). Tsy mbola manana filoha ity antoko ity, fa i Thierry Raveloson no Sekretera voalohan’ny antoko. Milaza ny mbola “hieritreritra” izy raha misy manolotra azy na hotendrena ho minisitra. 

Tia Tanindrazana

Samia mijoro ho an'i Gasikara.