Politique

Seza sy tombontsoa

Politique
Zoma 15 Oktobra 2010

Asa ry Jean na dia tany voaozona mihitsy ity Madagasikara ity, fa vao herinandro izay no mba tony kely taorian’ireny fitokonana tao amin’ny «port» ireny dia sakoroka be indray ny tanàna tao Toamasina omaly. Tena mampahatsiaro ny zava-nitranga ny alatsinainy 26 janoary ireny mihitsy anie ny fisehony, fa tsy nisy afo nirehitra fotsiny e ! Ka inona ary ho ianao no zava-misy ? Io ry Jean ilay olana sosialy efa nambarako teto iny a ! Na izaho aza efa nilaza fa hitsahatra tsy hanoratra intsony raha tafita tany aminareo ny serasera nifanaovana hatrizay saingy indrisy. Manao be marenina ianareo ka dia zakao izay vokany. Vao manomboka io, hoy i Kaina. Jereo ireny teny amin’ny 67ha ireny, resaka taxibe no nampirefotra ny tanàna, dia io indray ny any Toamasina, resaka posy sy posy bisikilety, dia asa koa izay hitranga eny amin’ny “gare routière” eny amin’ny 18 oktobra raha tsy hakana fepetra dieny mialoha, satria dia hisy ny tsy ho faly amin’ny fandaminana mikasika ireny fanomezan-dalana hitrandraka zotram-pitaterana ireny. Efa leo ny olona ry Jean, ela niafiana izy ireo fa ianareo tandapa no toa minia mikipy noho ny seza sy ny tombontsoa.

Marco