Politique

Partagé sur :
• facebook

Rehefa natao ny fanadihadiana rehetra dia nahafantatra tsara ny zavatra nataony ireo andiana miaramila tonga teny amin’ny lapan’ny tanàna Analakely ny alarobia hariva lasa teo.

Nisy mihitsy ny fihetsika natao mba nanindriana aloka ny kaominin’Antananarivo Renivohitra. Ny mpitantana no tena lasibatra teto. Tsy niitatra be tahaka iny mantsy ny fifandirana teo amin’ny polisy monisipaly izay manao ny asany ara-dalàna sy ilay vadina miaramila ambara fa voakasi-tanana. Ny miaramila avy ao amin’ny Capsat Soanierana sy ny RAS Ampahibe no nanao be fiavy teny amin’ny lapan’ny tanàna Analakely, soa fa teo ihany ny Emmo reg nanelanelana sy nisoroka ny mety fifandonana hitranga. Miha mazava ankehitriny ny raharaha. Tsy tongatonga ho azy ireny fa fanararaotana tranga iray mba hanaratsiana endrika tsotra izao ny kaominin’Antananarivo Renivohitra sy ireo mpitantana azy. Raha tsorina, ny ben’ny tanàna Lalao Ravalomanana mihitsy no ezahan’ny sasany hosoketaina fa manome baiko ny polisy monisipaly hikasi-tanana ny mivarotra amoron-dalana.

Hosoloina PDS ?

Mazava tsara anefa ny resaka fa olon’ny fifampiresahana sy ny fifandeferana i Lalao Ravalomanana fa ireo izay mety mahita tombontsoa amin’ny faminganana azy no be resaka etsy sy eroa. Paikady tsy vahiny amin’ny mahalala ny tontolo politika iny natomboka tamin’ny alarobia hariva eny Analakely iny fa dia tafiditra ao anatin’ireo dingana handrodanana ny ben’ny tanàna Lalao Ravalomanana ka hametrahana PDS indray eto an-drenivohitr’i Madagasikara. Miafina any ambadik’ireo milaza ho mpivarotra amoron-dalana ireo olona mivoy io resaka io. Misy efa fantatra ihany moa izy ireo fa hanohy ny fanadihadiana ny mpanao gazety ary tsy maintsy avoaka eo ihany marina satria tsy mety ny mifamitaka sy mifampiesona.Misy koa ny manampahefana ambony mijapy ny raharaha tahaka izao  ary tsy maintsy ho fantatra eny ihany izy io satria tsy misy governemanta maharitra mandrakizay izany eto e !

RTT

Tia Tanindrazana

Samia mijoro ho an'i Gasikara.