Politique

Rezervista 2009 Manome 48 ora ny FAT

Politique
Alatsinainy 18 Oktobra 2010

Ela niandrasana ny fampanantenana nataon�ny filohan�ny FAT azy ireo miaramila fiandry na rezervista nanohana ny tolona tamin�ny taona 2009 ka nivoaka tamin�ny fahanginany.

Nisy ny fivoriana notontosain’izy ireo tetsy Androndra ny sabotsy 16 oktobra teo izay nandraisany fanapahan-kevitra manoloana ny fandrirarirana natao azy ireo. Manome 48 ora ny FAT ireto farany handraisana azy ireo indray ho miaramila feno na ilay antsoina hoe : “rengagement” raha tsy izany dia hilanja sorabaventy eny Ambohitsorohitra eo amin’ny tsangambaton’ireo lavo nandritra ny 07 febroary 2009 izy ireo. “Miandry izahay ny alatsinainy sy talata ka rehefa tsy tontosa izay fangatahana izay dia hanao io fanehoan-kevitra ankalamanjana io izahay ny alarobia”, hoy ny fanambarana. Nanao sorona ny ainy ho fampandresena ny tolona notarihin’ny filohan’ny FAT ankehitriny ireto rezervista ireto izay niambina ny Viva, ny “émetteur” teny Ambohimitsimbina ary ireo ministera taorian’ny famakiana ireto biraom-panjakana ireto. Ho setrin’izany dia nanome toky ny hamerina azy ireo ho miaramila raikitra i Andry Rajoelina rehefa mandresy ny tolona, araka ny filazan’izy ireo. “Aoka mba hotanterahinao ny teninao teny amin’ny Kianjan’ny 13 mey”.

Raha ny fanazavan-dRamanantena Eugène Pierre, mpitondra teny dia nandalo tamin’ny antanatohatra isan-tsokajiny izy ireo fa tsy nahitam-bokany avokoa izany. Efa nisy ny fihaonana tamin’ny ministry ny foloalindahy teo aloha, ny jeneraly Rakotonandrasana Noel sy ny lehiben’ny Etamazaoro miaramila, Ndriarijaona Jean André izay samy nanome toky ny hanatanteraka ny fampanantenana nataon’i Andry Rajoelina. “Nasaina nametraka laharan-tariby ny solontenanay ka nahazo sms avy any amin’ny ministeran’ny fololindahy tokoa izahay milaza fa horaisina avokoa amin’ny 15 febroary 2010”. Efa nanatona an’i Alain Ramaroson koa izy ireo saingy tsy nahazo valiny mahafa-po raha ny nambarany ihany. Leon’ny andraso andraso lava sy fampanantenana poak’aty ireto rezervista ireto ka nangataka fihaonana tamin’i Andry Rajoelina mivantana fa tsy mety voaray mihitsy. “Im-polo raha vitsy izahay no efa niakatra teny Ambohitsorohitra”, hoy hatrany Ramanantena Eugène. Dia izao tonga amin’ny tsotsorimamba isarahana izao ny raharaha. Miisa 400 eo ho eo ireto rezervista ireto izay miaina ao anatin’ny fahasahiranana tanteraka satria tsy miasa ny ankamaroany.

Yves