Politique

Partagé sur :
• facebook

“Mandalo fahasahiranana goavana ny orinasa Secren toeram-piasanay amin’izao fotoana izao”, hoy ny mpiasa iray, niresaka mivantana tamin’ny filoha Marc Ravalomanana tamin’ny alalan’ny antso an-tariby tany Antsiranana ny sabotsy teo.

«Henoko izay ka hataoko anatin’ireo ezaka hitadiavako vahaolana avy aty ivelany io orinasa Secren io. Tsara indrindra ny nilazanao izany, misaotra anareo fa tsy avelatsika ho faty ny Secren”, hoy kosa ny filoha namaly ny ahiahin’ity mpiasa. Tsy ny orinasa Secren ihany moa no nasian-dRavalomanana teny fa teo koa ny fiainana ankapoben’ny Malagasy mihitsy izay tsy mitsaha-mitotongana hatramin’ny nisian’ny fanonganam-panjakana teto amintsika ka nitondran’ny Fahefana Avon’ny Tetezamita ny Fanjakana. Tsy vitsy, hoy izy ny tsy afaka mampiana-janaka, tsy misakafo araka ny tokony ho izy intsony noho ny fahasahiranana lalina. Ankoatra izay dia anisan’ireo lasibatry ny fahatapahan’ny famatsiam-bolan’ny Vondrona Eoropeanina iny tapany avaratry ny Nosy iny.

Araka ny fanazavana, tsy azo hamboarina indray ny lalana mampifandray an’i Vohémar sy Ambilobe izay efa tao anatin’ny fandaharan’asan’ny fanjakana tamin’ny fitondrana Ravalomanana. Nambaran’ity farany fa dia “mahonena ny toetran’ny olona sasany matim-bola sy voninahitra ka mahavita ny mamadika palitao. Tiako i Madagasikara”, hoy izy. “Raha zavatra tsy ho vitako dia tsy nolazaiko”, hoy ihany izy manamafy. “Noheveriko toy ny zanako i Madagasikara ka notiaviko ka nanaovana iny drafitra Madagasikara Amperin’asa na Map iny”, hoy ihany i Marc Ravalomanana izay nilaza fa tsy matory andro aman’alina mitady izay vahaolana amin’ny fomba rehetra na ara-politika na ara diplomatika hivoahan’i Madagasikara amin’izao krizy izao. “Aoka isika, tsy hofitahan’ireo mpamafy lainga etsy sy eroa”, hoy ihany izy. Nanamafy moa ny filoha Marc Ravalomanana fa mbola vonona tanteraka hanompo ny fireneny ny tenany.

Tia Tanindrazana

Samia mijoro ho an'i Gasikara.